Myndgreiningarmorgnar

18. september 2019

Meðal þess efnis sem Héraðsskjalasafn Kópavogs tekur við til varðveislu eru ljósmyndir, kvikmyndir, hljóðupptökur og filmur af ýmsum gerðum.

Ljósmyndaforði skjalasafnsins, sem að hluta til er birtur á myndavef, spannar tugþúsundir mynda en hluti þess er ekki fullskráður, ekki er vitað nákvæmlega hvað fyrir augu ber á þeim myndum. Nauðsynlegt er fyrir skjalasafnið að skrá sem best allar myndir sem það varðveitir og halda þeim þannig aðgengilegum til langframa. Með því er gildi myndanna haldið til haga. Héraðsskjalasafnið ásamt Sögufélagi Kópavogs stendur fyrir myndgreiningarmorgnum opnum almenningi þar sem allir leggjast á eitt við að bera kennsl á myndefnið. Leitast er við að svara spurningunum um það hverjir eru á myndinni, hvar myndin er tekin og hvenær. Oftar en ekki koma í kjölfarið fleiri upplýsingar og sögur sem auka enn á varðveislugildi myndanna.

Myndgreiningarmorgnar eru öllum opnir í húsakynnum Héraðsskjalasafns Kópavogs að Digranesvegi 7. Ókeypis er inn og heitt á könnunni. Hjólastólaaðgengi er að safninu og þeim sem koma akandi er bent á bílastæði við safnið og bílakjallarann við Hamraborg.

Myndgreiningarfundir eftir sumarhlé eru:

25. september 10:30 – 11:30

9. október 10:30 - 11:30

23. október 10:30 - 11:30

20. nóvember 10:30 - 11:30

4. desember 10:30 - 11:30